Ish-deputeti i Kuvendit të Kosovës nga Partia Demokratike e Kosovës, Hysen Berisha, në emisionin Arb Debat me Rid Berishën, ka thënë se vonesat në krijimin e qeverisë nuk janë korrekte.
Berisha ka thënë se sikur Kosova të përballej vetëm me Serbinë në luftën e fundit, fundi do të ishte fatal për popullin e Kosovës.
“Është e vërtetë që Serbia është parë gjithmonë dhe ka qenë shtet agresor, shtet që i ka shkaktuar të gjitha luftërat brenda republikave dhe popujve të ish-Jugosllavisë, dhe të fundit me Kosovën. Sikur ne të përballeshim vetëm me Serbinë, fundi do të ishte fatal për ne. Unë e di që ne do të mbetnim UÇK luftëtarë, trima, heronj, njerëz të gatshëm për sakrificë për vendin e vet dhe për liri. Por pasojat do të ishin fatale për Kosovën,” ka thënë Berisha në Arb Debat.
Ai ka shtuar se të gjitha rezultatet pozitive për Kosovën kanë ndodhur kur ka pasur koordinim me aleatët.
Sipas tij, me ardhjen e presidentit amerikan Donald Trump, do t’i jepet një mundësi tjetër Kosovës në disa aspekte.
“Eskobar apo Hovenier, njëri nga ata ka thënë se Kosova është pjesë e gjeostrategjisë amerikane për rajonin dhe raportet e shqiptarëve me Amerikën nuk mund të prishen për shkak se vjen një kryeministër që mund të jetë destruktiv. Doktrina e re e Trump, mbi çështjet e sigurisë dhe mbrojtjes në Europë, mbi çështjen e zhvillimit ekonomik dhe taksave, ka për ta ndryshuar dhe ka për t’i dhënë një mundësi tjetër Kosovës,” ka thënë Berisha.