Analisti Basri Beka i është drejtuar me një mesazh publik liderit të AAK-së, Ramush Haradinaj, duke e cilësuar atë si një figurë që shkon përtej politikës së zakonshme dhe mbetet simbol i luftës dhe qëndresës shqiptare.
Sipas Bekës, mbështetja ndaj Haradinajt ndër vite nuk ka qenë thjesht elektorale, por e bazuar në qëndrimin dhe identitetin e tij kombëtar. Ai thekson se edhe në periudha kur partia nuk ka qenë e organizuar fuqishëm apo nuk ka pasur rezultat të lartë zgjedhor, Haradinaj është parë si faktor për shkak të figurës së tij.
Megjithatë, Beka kritikon një fazë të veçantë të veprimit politik të tij, duke e cilësuar si gabim afrimin me rryma fetare dhe figura si Shefqet Krasniqi. Sipas tij, kjo ka krijuar një çarje me bazën reale të elektoratit, i cili nuk pranon kompromise me agjenda që, siç shprehet ai, relativizojnë identitetin kombëtar shqiptar.
“Reagimi erdhi në formën e rënies së mbështetjes, deri në kufijtë e pragut,” vlerëson Beka, duke shtuar se kjo duhet të shërbejë si reflektim politik.
Ai nënvizon se sa herë që Haradinaj i rikthehet vijës së tij të fortë kombëtare, mbështetja rikthehet, pasi qytetarët e identifikojnë me një figurë të pakompromis në çështje kombëtare.
Në fund, Beka e përshëndet fjalimin e fundit të Haradinajt, duke e cilësuar si të fortë dhe në drejtimin e duhur, ndërsa i bën thirrje që të mos kërkojë vota në segmente ku, sipas tij, rrezikon të humbasë identitetin politik.
“Populli shqiptar nuk ka nevojë për një version të zbutur tëndin – ka nevojë për Ramushin pa kompromis,” përfundon mesazhi i Bekës, duke shtuar se nëse vazhdon në këtë linjë, Haradinaj mund të rikthejë besimin dhe të marrë sërish rolin e prijësit politik.