Analisti dhe njohësi i çështjeve politike, Basri Beka, ka reaguar kundër iniciativës për ndryshimin e Kushtetutës që do të mundësonte zgjedhjen e drejtpërdrejtë të Presidentit të Kosoves.
Sipas Bekës, dërgimi në Kuvend i amendamenteve kushtetuese për këtë çështje është një hap i gabuar politik dhe institucional, i cili në këtë moment mund të rrezikojë stabilitetin demokratik të vendit më shumë sesa ta forcojë atë.
Ai thekson se Kosova mbetet një demokraci e re, e dalë nga një proces i gjatë historik dhe nga një rrugëtim i vështirë i shtetformimit. Sipas tij, edhe pse sot ekziston një gjeneratë e re që e trashëgon lirinë, kjo nuk nënkupton se kultura demokratike është konsoliduar plotësisht.
Beka vlerëson se shpesh elitat politike, partitë dhe liderët institucionalë nuk e kanë kuptuar thelbin e demokracisë, që sipas tij nënkupton kompromis politik, bashkëjetesë dhe ndarje të përgjegjësive për hapësirën e përbashkët shtetërore.
Ai paralajmëron se ndryshimi i Kushtetutës për të zgjidhur krizat momentale politike krijon precedent të rrezikshëm, duke theksuar se Kushtetuta nuk duhet të përdoret si mekanizëm për t’i shmangur përgjegjësitë politike, por si themel i stabilitetit institucional të shtetit.
Në reagimin e tij, Beka argumenton gjithashtu se zgjedhja e drejtpërdrejtë e Presidentit në një shoqëri të polarizuar mund të prodhojë një mandat të fortë politik për një figurë që sipas Kushtetutës duhet të jetë unifikuese dhe mbi-partiake. Kjo, sipas tij, rrezikon ta politizojë më tej institucionin e Presidentit dhe të krijojë tensione të reja institucionale në sistemin parlamentar.
Ai shton se në vend të ndryshimeve të nxituara kushtetuese, vendi duhet të kalojë edhe disa cikle zgjedhore për të ndërtuar kulturën e kompromisit politik, duke theksuar se krizat në demokraci zgjidhen përmes marrëveshjeve politike dhe jo përmes rishkrimit të rregullave të lojës.
Sipas Bekës, Kosovës i nevojitet më shumë pjekuri demokratike dhe jo eksperimente kushtetuese të motivuara nga rrethanat politike të momentit. Ai përfundon se pa një kuptim të thellë të demokracisë si përgjegjësi dhe ndarje e hapësirës së përbashkët politike, çdo ndryshim formal në Kushtetutë mund të prodhojë më shumë krizë sesa stabilitet.