Avni Ajeti ka kritikuar Rrustem Mustafën, duke thënë se ideologjia e Selim Obrançës dhe Albin Kurtit nuk duhet të ndikojë në qëndrimet e Partisë Demokratike të Kosovës (PDK).
Në një reagim publik, Ajeti ka vlerësuar se PDK-ja nuk duhet të mendojë me logjikën e Rrustem Mustafës, për të cilin thotë se nuk ka vizion politik.
Ai gjithashtu ka pretenduar se Mustafa po u afrohet figurave që kanë kaluar në Vetëvendosje, duke përmendur Isak Shabanin, Idriz Shabanin dhe Shpejtim Bulliqin në Komunën e Podujevës.
Ajeti ka kritikuar edhe qëndrimin e Mustafës lidhur me çështjen e Deklaratës së Pavarësisë së Kosovës, duke i bërë thirrje PDK-së që të distancohet nga, siç shprehet ai, figurat që po e dëmtojnë partinë.
Në fund, Ajeti i ka drejtuar një mesazh të drejtpërdrejtë Mustafës, duke i kujtuar se, sipas tij, qytetarët nuk do t’ia falin një gabim të dytë politik.