Mbrëmë në një qendër tregtare në Ferizaj, Policia ka arrestuar rojen e sigurisë, pasi dyshohet se ka sulmuar fizikisht një grua.
Rasti është konfirmuar edhe nga Policia, ndërsa është zbuluar se i dyshuari që përfundoi në pranga kishte urdhëresë aktive të lëshuar nga Gjykata.
Sinjali raporton se i dyshuari për këtë rast është Jetmir Asani, rreth 27-vjeçar, roje në qendrën “The Village – Shopping & Fun”.
Asani u denoncua nga një grua, e cila raportoi se është sulmuar fizikisht nga I njëjti, për motive akoma të panjohura.
Si rezultat, Policia ka intervenuar dhe të dyshuarin e ka shoqëruar në stacion policor, ndërsa I ka gjetur dhe sekuestruar elektroshok dhe sprej.
Ndaj tij, Prokurori i Shtetit ka urdhëruar inicimin e hetimit në procedurë të rregullt.
Edhe pse për këtë rast nuk u ndalua, i riu përfundoi në qeli për një rast tjetër.
Të njëjtat burime kanë bërë me dije se Jetmir Asani ka pasur urdhëresë të lëshuar nga gjykata, lidhur me një rast të mëhershëm, për çka është dërguar në njërën nga qendrat e paraburgimit për ta vuajtur dënimin.
Sinjali ka kontaktuar edhe qendrën tregtare për të marrë një deklaratë, por personi i cili është përgjigjur ka thënë se nuk është kompetent dhe megjithatë nuk ka ofruar një numër kontraktues të përgjegjësve.
