Policia e Kosovës ka arrestuar 10 persona të dyshuar për posedim të narkotikëve e armëmbajtje pa leje në Prishtinë.
Në një komunikatë për media bëhet e ditur se të njëjtit janë arrestuar në flagrancë, derisa jepen edhe detaje tjera rreth rastit.
“Policia e Kosovës, Drejtoria për hetimin e trafikimit me narkotik (DHTN) në Prishtinë, pas hetimeve rreth dy mujore të rastit të koduar me emrin ‘Përsëritësi’, dje më datë 01.01.2023 rreth orës 17:15 në rrugën ‘Vëllezërit Fazliu’ në Prishtinë, në koordinim dhe bashkëpunim të plotë me Prokurorinë e Shtetit dhe Gjykatën (GJPP) kompetente, mbështetur edhe nga stacioni policor Veriu në Prishtinë, kanë realizuar një plan taktik policor gjatë të cilit në flagrancë janë ndaluar dhe arrestuar dhjetë (10) persona të dyshuar meshkuj, të përfshirë në veprime të kundërligjshme”, thuhet në raport.
Bëhet e ditur se gjatë operacionit policor është bastisur një shtëpi banimi në Prishtinë dhe janë kontrolluar pesë automjete, ku me këtë rast në cilësi të provave materiale janë sekuestruar dëshmitë si në vijim:
96.6 gramë substancë e dyshuar narkotike e llojit marihuanë
44.4 gram substancë e dyshuar narkotike e llojit kokainë
1 armë zjarri
2 karikator
17 fishek
358.8 para kesh (euro) të dyshuara të jenë fituar nga shitja e narkotikëve.
4 telefona celular
1 peshore digjitale
Pas kompletimit të rastit me vendim të Prokurorit kujdestar, katër nga të dyshuarit dërgohen në mbajtje, kurse të tjerët janë liruar në procedurë të rregull. /TV Arbëria
