Analistja Afërdita Maliqi ka kritikuar Akademinë e Shkencave të Kosovës pasi sipas saj, në situatat kur vendi ndodhet në kriza Akademia si institucion të paktën do të duhej të japë qartësi apo një rrugë opinionit publik.
Maliqi në emisionin “ARB DEBAT”, madje tha se nuk e din realisht as cilët janë akademikët pasi siç tha ajo, asnjëherë nuk ua ka ndëgjuar zërin.
“Unë realisht nuk e di as kush është akademikë se nuk ja’u ni zanin kurrë. As s’kanë dalë një herë me një komunikatë për një çështje të caktume kur vendi ka pasë kriza ose siç ndodhë në vendet e rajonit ku shohim gjëra të tilla. Unë kurrë se kam pa që Akademia e Shkencave ka dalë me një qëndrim konkret që në njëfarë mënyre si kupola e intelektualizmit e akadamikëve i jep pak rrugë ose qartësi edhe opinionit publik, unë nuk e kam pa. Nuk besoj që janë neutral, unë mendoj që ata janë frikacakë dhe s’kanë mendim kritik. Do me thënë e kanë veten përpara, i kanë pagat e mira kaq”, tha ajo.
Derisa analisti, Afrim Kasolli u shpreh se nuk pret diçka më konkrete nga Akademia e Shkencave, madje ai ironizoi duke thënë ”I pasna harru krejt që ekzistojnë”.
“Nuk dinë e s’kanë çka me thënë, kështu që unë nuk kam besim, as nuk pres diçka më konkrete prej tyre. I pasna haru krejtë që ekzistojnë”, shtoi ai në TV ARBËRIA.