Kryetari i Lidhjes Demokratike të Kosovës, Lumir Abdixhiku, ka pritur të mërkurën në takim ambasadoren e Kroacisë në Kosovë, Daniela Barišić.
Siç ka njoftuar LDK-ja përmes një komunikate, në këtë takim u diskutua për zhvillimet e fundit politike në vend, me theks të veçantë mbi situatën e krijuar si pasojë e ngërçit institucional, që sipas LDK-së është shkaktuar nga mungesa e vullnetit politik të partisë së parë në vend.
Abdixhiku ritheksoi nevojën urgjente për formimin e institucioneve funksionale.
“Kryetari Abdixhiku dhe ambasadorja Barišić biseduan edhe për rëndësinë e përkrahjes dhe përfaqësimit të komunitetit kroat në Kosovë, si dhe nevojën për ofrimin e shërbimeve të drejta dhe të barabarta për të gjithë qytetarët e Kosovës, përfshirë ato nga niveli lokal ku LDK udhëheq komunën përkatëse. Kryetari Abdixhiku theksoi përkushtimin e LDK-së për respektimin dhe mbrojtjen e të drejtave të komuniteteve shumicë dhe pakicë, si gurthemel i stabilitetit dhe bashkëjetesës në vend. Kryetari Abdixhiku gjithashtu shprehu mirënjohje të thellë për përkrahjen e vazhdueshme që shteti mik kroat i ka dhënë Republikës së Kosovës, në veçanti në arenën ndërkombëtare dhe në proceset integruese”, thuhet në komunikatën e LDK-së.