E keni menduar ndonjëherë pse nuk po e fitoni betejën me përgjumjen, edhe pasi keni fjetur “top” gjithë natën?
Ju ngriheni nga shtrati sikur të keni bërë një maratonë në vend që të keni pushuar. Të gjithë kemi pasur ditë ku as kafeja më e fortë nuk na ka bërë punë për të na larguar ndjesitë e përgjumjes. Por, nëse kjo përsëritet vazhdimisht, a është një shenjë që trupi juaj po përpiqet të komunikojë diçka më serioze?
Kur përgjumja fillon të jetë pjesë e përditshmërisë tuaj dhe nuk ikën edhe pas disa netëve me gjumë të mjaftueshëm, atëherë ka diçka më tepër që nuk shkon. Studimet tregojnë se përgjumja e vazhdueshme mund të jetë një simptomë e një sërë problemesh shëndetësore të fshehura që nuk duhen marrë lehtë.
Për shembull, sindroma e apnesë obstruktive të gjumit – një gjendje ku rrugët e frymëmarrjes bllokohen gjatë gjumit, duke shkaktuar ndalime të përkohshme të frymëmarrjes. Kjo ndalon oksigjenin që të arrijë në trurin tuaj si duhet, duke bërë që të zgjoheni të ndiheni sikur nuk keni fjetur fare.
Po ashtu, hipersomnia, një gjendje ku ndiheni të përgjumur gjatë gjithë ditës, edhe pasi keni fjetur gjatë natës, mund të jetë një tjetër shenjë që diçka nuk po shkon. Kjo mund të lidhet me probleme neurologjike apo hormone të çrregullta, të cilat kanë ndikim të drejtpërdrejtë në ciklin e gjumit tuaj.
Por, jo çdo përgjumje është e lidhur me ndonjë gjendje të rëndë. Shpesh, dieta jonë mund të jetë një faktor i rëndësishëm. Një vakt i rëndë para gjumit ose mungesa e një diete të balancuar mund të ndikojë në cilësinë e gjumit tuaj, duke ju bërë të ndiheni të lodhur dhe të përgjumur gjatë ditës, pavarësisht orëve të gjumit. Pa harruar stresin! Stresi kronik mund të ndikojë në funksionimin e hormoneve tuaja, duke ndërhyrë në cilësinë e gjumit.
Në fund të ditës, është e rëndësishme të mos injoroni sinjalet që trupi juaj ju dërgon. Nëse ndiheni gjithmonë të përgjumur, mos e kaloni vetëm si një lodhje normale.
Është koha të merrni një pikëpamje më shkencore: Konsultohuni me një mjek, bëni analizat e nevojshme dhe zbuloni nëse përgjumja juaj është vërtet një shenjë paralajmëruese e një problemi më të madh shëndetësor.
