Pas dështimit të Qeverisë Kurti 3, Kosova mbetet në bllokadë institucionale.
Qeveria Kurti 3 ka dështuar të formohet, duke lënë Kosovën në një situatë të pasigurt politike dhe institucionale.
Vetëvendosje (VV), si partia fituese e zgjedhjeve të 9 shkurtit, nuk arriti t’i sigurojë 61 votat e nevojshme për të krijuar shumicën parlamentare.
Kjo ndodhi pas tetë muajve nga mbajtja e zgjedhjeve, duke shkaktuar një bllokadë institucionale që po e pengon funksionimin normal të institucioneve të vendit.
Opozita me 52 vota, mungojnë edhe 9 për shumicën
Sipas përbërjes aktuale të Kuvendit, VV ka 48 deputetë, PDK 24, LDK 20, AAK dhe Nisma 8, komunitetet joshumicë 10, dhe Lista Serbe 10 deputetë, gjithsej 120.
Në rast të një marrëveshjeje opozitare ndërmjet PDK-së, LDK-së, AAK-së dhe Nismës, këto parti do të kishin 52 vota, duke u munguar edhe 9 vota për ta formuar qeverinë.
Këto vota shtesë mund të siguroheshin nga përfaqësuesit e komuniteteve, megjithëse ata deri më tani kanë mbështetur formimin e një Qeverie Kurti 3.
Nëse ky skenar dështon, Lista Serbe mbetet opsioni i vetëm për të arritur shumicën, por një koalicion i tillë, sipas analistëve, do të ishte politikisht fatal për Kosovën.
Analisti: Numerikisht e mundur, politikisht e pamundur
Analisti politik Kasolli vlerëson se, ndonëse në aspektin numerik krijimi i një qeverie nga opozita është i mundur, nuk ekziston vullnet politik për një bashkëpunim të tillë.
Sipas tij, mungesa e besimit mes partive opozitare dhe kalkulimet politike po e bëjnë të pamundur ndërtimin e një qeverie alternative.
Kriza mund të thellohet
Situata aktuale po e lë Kosovën në një gjendje të paqartë politike, ku vendi rrezikon të hyjë në një periudhë të krizës së thelluar institucionale dhe ekonomike, nëse nuk arrihet një zgjidhje e shpejtë.
Mosmarrëveshjet ndërmjet partive politike mund të vonojnë edhe më tej formimin e institucioneve të reja dhe miratimin e buxhetit, duke ndikuar drejtpërdrejt në stabilitetin shtetëror. /TV Arbëria