Deputeti i Lidhjes Demokratike të Kosovës, Avdullah Hoti ka kritikuar kryeministrin Albin Kurti, për mënyrën se si po e udhëheq vendin.
Hoti thotë se mungojnë projektet për arsim, shëndetësi, etj.
Sipas tij, zhvillimi ekonomik ka rënë gati nën zero dhe se Kurti po promovon shpërndarjen e qeseve plastike.
“Është fundi i vitit 2023, që është viti i tretë i qeverisjes majtiste LVV-Guxo. Është koha kur do të duhej të promovoheshin projektet e kryera gjatë tri viteve në rrugë, në arsim e shëndetësi, në energjetikë e në ujitje të tokave bujqësore. E kur mungojnë këto projekte, atëherë vetë Kryeministri promovon shpërndarjen e qeseve plastike nëpër dyqane, sado e rëndësishme që është kjo për ambientin, por nuk është esencial në aspektin ekonomik dhe jetën e rënduar të qytetarëve”, thotë ai.
Deputeti i LDK-së shkruan më tej se “tri vjet qeverisje pa asnjë orientim zhvillimor, me normë të zhvillimit ekonomik që gati ka rënë në zero”.
“Tri vjet të qeverisjes vetëm duke shpërndarë subvencione e transfere, të cilat kanë shkuar nga 32% në mbi 42% të buxhetit total.Tri vjet qeverisje me rënie të investimeve kapitale nga rreth 23% të buxhetit total sa ishin në qeveritë paraprake, në vetëm 15% të buxhetit total”, ka pohuar ai.
Hoti thotë mes tjerash se kjo lloj qeverisjeje vetëm zhvillim nuk sjell.
/TV Arbëria
