UEFA ende nuk ka vendosur nëse do të shtyhet ndeshja ndërmjet Kosovës dhe Izraelit, e cila është planifikuar të luhet me 15 tetor në stadiumin “Fadil Vokrrit” në Prishtinë.
Në një përgjigje të shkurtër me shkrim, zyra për media e UEFA, i ka thënë RTV Dukagjinit, se është duke e monitoruar situatën dhe është në kontakt të vazhdueshëm me palët e përfshira.
“UEFA do të vazhdojë që ta monitorojë situatën për së afërmi dhe do të jetë në kontakt me të gjitha ekipet që janë të përfshira para se ta marrim një vendim për datat e reja dhe në ndryshime potenciale për ndeshjet e ardhshme. Për momentin, nuk kemi ndonjë koment tjetër për këtë temë”, shkruan në përgjigjen e shtëpisë së futbollit evropian.
/TV Arbëria