Siç bëhet e ditur nga “90min”, skuadra e Newcastle United ka shprehur interesim në yllin e Barcelonës, Ousmane Dembele.
Thuhet se ndërmjetësuesit e Newcastle veçse janë takuar me kampin e Dembeles për të diskutuar mundësinë e transferimit të yllit francez në Premier Ligë.
Dembele, i cili ka edhe një vit të mbetur në kontratën aktuale me Barcelonën, ishte në një vizitë në Angli për ta shikuar ndeshjen mes Sunderland dhe Sheffield United, ndërsa pas ndeshjes thuhet se ishte takuar me disa ndërmjetësues që e përfaqësonin Newcastle.
Pronarët e Newcastle, njëkohësisht, pronarët më të pasur në planet, kanë adoptuar një qasje të kujdesshme sa i përket biznesit me transferime, pavarësisht se shpenzuan shumë në sulmuesin, Alexander Isak, por kualifikimi në sezonin e ardhshëm të Ligës së Kampionëve do t’i detyrojë ata që të përshpejtojnë planet për të nënshkruar me disa emra të mëdhenj gjatë kësaj vere.
Dembele do të ishte një zgjidhje ideale për Newcastle, duke marrë parasysh se vetë ylli francez është i tërhequr nga fakti që të luaj në Premier Ligë.
/TV Arbëria