Toni Kroos beson se Super Liga Evropiane eventualisht do të krijohet dhe e ka përkrahur konceptin për të sjellë më shumë emocione dhe entuziazëm në futboll.
Më herët kë të muaj, A22 zbuloi planet për ta ndryshuar idenë e Super Ligës Evropiane, ku 10 pika kyçe detajuan planin e garës, përfshirë këtu idenë që të jenë 60 deri në 80 skuadra dhe të jenë të paktën 14 ndeshje për çdo ekip në sezon.
Nuk do të kishte anëtarë të përhershëm, duke sjellë mundësinë e një sistemi promovimi dhe rënieje midis divizioneve, dhe nuk do të kërkonte që klubet të largoheshin nga ligat e tyre përkatëse.
Ky plan edhe një herë ka hasur në pengesë nga tifozët, ndërsa skuadrat nga Premier Liga thuhet se janë të hutuara nga ideja. Sidoqoftë, ylli i Real Madridit, Toni Kroos beson se Super Liga Evropiane është e pashmangshme.
Kroos e përkrahi idenë e Super Ligës dhe e shpjegoi pse ai mendon se futbolli ka nevojë për një ndryshim.
“Mendoj se do të shohim Super Ligën. Dhe unë besoj kështu për disa arsye”, tha Kroos.
“Ideja e Super Ligës ka ndryshuar dhe meriton të dëgjohet. Nëse shikoni me kujdes nga të dy këndet, do të shihni se UEFA nuk është aspak një samaritane e madhe për tifozët e futbollit dhe se Super Liga nuk ka plane, të paktën në përpjekjen e dytë, të përjashtojë asnjë ekip, sepse nuk do të ketë asnjë skuadër të përhershme.
Është një garë sportive, një turne i hapur, por i menaxhuar nga klubet dhe jo nga UEFA, sepse këto klube besojnë se nuk kanë nevojë për UEFA-n për këtë. Mendoj se kjo meriton të paktën një shans”, shtoi më tej Kroos.
Planet e reja për një Super Ligë Evropiane vijnë mes shqetësimeve në rritje për fuqinë financiare të Premier Ligës, 20 klubet e së cilës shpenzuan një total prej 915 milionë eurosh gjatë merkatos së janarit.
Ndërkohë që totali i shpenzimeve nga klubet e ligës në Spanjë, Itali, Francë dhe Gjermani së bashku arriti në pak më shumë se një të katërtën e kësaj shifre.
/TV Arbëria
