Kryetari i LDK-së, Lumir Abdixhiku u ka shprehur ngushëllime familjeve që kanë humbur më të dashurit e tyre si pasojë e tërmetit që ka goditur sot Turqinë dhe Sirinë.
Kryetari i LDK-së, ka potencuar se qytetarët e Kosovës bashkëndjejnë dhimbjen me qytetarët e të dyja vendeve.
“Më trishtoi lajmi për tërmetin që ka goditur Turqinë dhe Sirinë. Në emër të Lidhjes Demokratike të Kosovës u shprehë ngushëllime të gjitha familjeve për viktimat e tërmetit të tmerrshëm që i goditi këtë mëngjes. Të gjithë qytetarët e Kosovës bashkëndjejmë dhimbjen dhe solidarizohemi me qytetarët e të dyja vendeve në këto momente të vështira. Lutemi për viktimat dhe familjet e tyre.”, është shprehur Abdixhiku.
Të paktën 284 njerëz kanë vdekur dhe 2,323 të tjerë janë lënduar në 10 provinca pas një tërmeti të fortë që ka goditur sot në mëngjes Turqinë jugore. Zëvendëspresidenti Fuat Oktay ka bërë të ditur se 1710 ndërtesa janë shembur si pasojë e tërmetit.
Ndërkohë, Qeveria e Kosovës ka shprehur ngushëllime për viktimat dhe ka bërë të ditur se Republika e Kosovës dhe populli i Kosovës në këto çaste të vështira janë në gatishmërinë më të lartë për mbështetje dhe solidaritet.
/TV Arbëria