Policia e Kosovës ka arrestuar një person në Gjakovë pasi dyshohet se i njëjti kishte vjedhur një arkë të bamirësisë, në një furrë buke.
Në njoftimin e policisë bëhet e ditur se ngjarja ka ndodhur më 15 janar, në rrugën “Konferenca e Bujanit”, në Gjakovë.
“Bazuar në deklarimin e ankuesit, sipas të cilit në arkë kishin qenë rreth 150 euro, hetuesit e Stacionit Policor në Gjakovë kanë filluar me hetime mbi bazën e dyshimit se ishte kryer vepra penale e vjedhjes. Si rezultat i hetimeve të zhvilluara janë siguruar prova dhe dëshmi të mjaftueshme mbi bazën e të cilave edhe është arrestuar i dyshuari B. M., i lindur në vitin 1993, shtetas i Republikës së Kosovës i cili dyshohet se me datën 15.01.2023 kishte bërë vjedhjen e arkës”, thuhet në komunikatë.
Lidhur me rastin është njoftuar Prokurori i Shtetit, me vendimin e të cilit i dyshuari është ndalur në mbajtje për 48 orë.
/TV Arbëria
