Kryeministri Albin Kurti ka qëndruar në fshatin Llaushë të Skenderajt për të parë nga afër dëmet e shkaktuar pas vërshimeve. Atje është pritur nga kryetari i Komunës, Fadil Nura, i cili njoftoi për vizitën përmes një postimi në Facebook.
“Sot me kryeministrin e Republikës së Kosovës, z.Albin Kurti dhe me ministrat z.Armend Mehaj dhe z.Elbert Krasniqi, vizituam Llaushën, për të parë afër dëmet e shkaktuara nga vërshimet, që përveç ekonomitë familjare dhe bujqësia, edhe infrastruktura publike është në gjendje të rëndë, ku në disa zona është vështirësuar qarkullimi dhe furnizimet. Dëme të konsiderueshme u shkaktuan edhe ne fermën e pulave”, shkroi Nura.
Nura u shpreh se familjet e prekura dhe Skenderaj në tërësi, në këtë gjendje çfarë ndodhen pas përmbytjeve, kanë nevojë më shumë se kurrë për përkrahje nga niveli qendror, që të harrohet ajo që ndodhi e të nisim nga e para.
/TV Arbëria
