Viktor Gyökeresi ka kërkuar të largohet nga Arsenali dhe, me largimin e tij të mundshëm në janar, Mikel Arteta do të shqyrtojë disa alternativa për ta zëvendësuar sulmuesin suedez.
Të shtunën, më 17 tetor, “TEAMtalk” raportoi se “mungesa e mundësive” është arsyeja kryesore pse Gyökeres po kërkon largimin, pasi këtë sezon ka luajtur vetëm 56 minuta në Premierligë.
Reprezentuesi suedez e ka parë rëndësinë e tij në planet e Artetës të bjerë ndjeshëm, pasi sezonin e kaluar shënoi 14 gola në elitën e futbollit anglez. Trajneri spanjoll, megjithatë, preferon ta ketë Kai Havertzin si sulmues të parë.
Por, me afrimin e afatit kalimtar të janarit, Arsenali ka të ngjarë të kërkojë ta përforcojë skuadrën me një tjetër sulmues.
“SPORTbible” ka shqyrtuar katër emra që klubi londinez mund t’i transferojë pas hapjes së afatit kalimtar.
Julian Alvarez
Alternativa më e qartë është ylli i Atletico Madridit, Julian Alvarez, të cilin Arteta e kishte cilësuar si transferimin e tij të ëndrrave gjatë verës, por marrëveshja për argjentinasin nuk u realizua.
Alvarez e bëri të qartë se Barcelona ishte skuadra ku dëshironte të transferohej, ndonëse drejtori ekzekutiv i Atletico Madridit, Miguel Angel Gil Marin, këmbënguli se klubi madrilen “kurrë, absolutisht kurrë” nuk do ta shiste lojtarin e tij më të çmuar te Barcelona.
Qëndrimi i palëkundur i Atletico Madridit për të mos e shitur te një rival i drejtpërdrejtë i jep Arsenalit mundësinë për të siguruar transferimin e tij në janar ose verën e ardhshme, kur sulmuesi i klasit botëror pritet të kërkojë largimin.
Diego Simeone e ka aktivizuar 26-vjeçarin vetëm nga stoli në ndeshjet e La Ligës deri më tani këtë sezon, ndërsa e ka përfshirë në formacionin titullar në të dyja ndeshjet e Ligës së Kampionëve.
Megjithatë, është e qartë se Alvarez e sheh të ardhmen e tij diku tjetër, ndërsa detyra e Arsenalit është ta bindë ish-lojtarin e Manchester Cityt që t’i bashkohet skuadrës londineze.
Eli Junior Kroupi
Sulmuesi i Bournemouthit, Eli Junior Kroupi, ishte në radarët e Arsenalit gjatë verës, pasi shënoi 13 gola në Premierligë pas transferimit nga Lorient për 10 milionë funte.
Interesim për 20-vjeçarin shfaqi edhe rivali i Arsenalit, Tottenham, por asnjëri klub nuk e testoi vendosmërinë e Bournemouthit me një ofertë, pasi ky i fundit ia caktoi çmimin prej 100 milionë funtesh.
Kjo shumë marramendëse bëri që të dy klubet të tërhiqeshin nga ideja për të paraqitur një ofertë për francezin, ndërsa mundësia e largimit të tij gjatë verës u shua plotësisht pasi ai pësoi një frakturë në këmbë në fund të gushtit.
Kroupi pritet të rikthehet nga ky lëndim i rëndë në fillim të nëntorit dhe ndoshta kjo është koha ideale që Arsenali të testojë mundësinë e transferimit të tij me një ofertë në janar.
Francezi do t’i sillte repartit ofensiv të Artetës shpejtësi të jashtëzakonshme, lëvizje depërtuese dhe aftësi të nivelit të lartë për të finalizuar rastet.
Problemi i vetëm është se Bournemouthi nuk dëshiron të ndahet nga sulmuesi i tij i yllit gjatë janarit. Megjithatë, me bashkëlojtarin e tij Alex Scott që tashmë po kërkon largimin, edhe Kroupi mund të ndjekë të njëjtën rrugë.
Nicolo Tresoldi
Arsenali e përforcoi skuadrën nga Club Brugge gjatë kësaj vere, duke transferuar anësorin Christos Tzolis, ndërsa duket se mund të rikthehet në kampionatin belg në kërkim të Nicolo Tresoldit.
Sipas mediumit italian “Tuttosport”, Arsenali është ndër klubet që kryesojnë garën për Tresoldin, i cili është shndërruar në njërin prej sulmuesve më produktivë në Evropë, me 32 gola në 69 paraqitje për Club Bruggen, që nga transferimi i tij nga Hannoveri në vitin 2025.
I aftë të tërhiqet prapa për të ndihmuar në ndërtimin e aksioneve dhe të depërtojë në zonë për të finalizuar rastet, reprezentuesi i Gjermanisë U21 do të përshtatej në mënyrë ideale në repartin ofensiv të Artetës, përkrah Bukayo Sakës dhe ish-bashkëlojtarit të tij Tzolisit. Ai do të krijonte gjithashtu konkurrencë të fortë për Havertzin.
Megjithatë, Arsenali do të duhet të përballet me konkurrencën e madhe për 22-vjeçarin, pasi Atletico Madridi dhe Barcelona janë ndër klubet favorite për të siguruar shërbimet e tij.
Erling Haaland
Tri alternativat e lartpërmendura janë, në njëfarë mënyre, të arritshme për Arsenalin në janar ose më vonë. Ndërkaq, transferimi i makinerisë së golave të Manchester Cityt, Erling Haaland, do të ishte një ëndërr që mund të bëhej realitet vetëm nëse City do të binte nga Premierliga.
Rënia nga Premierliga është një nga dënimet me të cilat mund të përballet City, nëse dështon në ankesën e tij, pasi komisioni i pavarur e shpalli fajtor për shkeljen e pothuajse të gjitha 115 akuzave të ngritura ndaj klubit.
Sipas raportimeve, Arsenali ka shfaqur interesim për Haalandin në rast se Manchester City përjashtohet nga elita e futbollit anglez. Sulmuesi norvegjez pothuajse me siguri do të largohej nëse skuadra e tij do të binte në Championship.
Nëse Haalandi dëshiron të vazhdojë të luajë në Premierligë, atëherë besnikëria e tij ndaj Manchester Cityt do të vihej në sprovë, pavarësisht se vetëm vitin e kaluar nënshkroi një kontratë nëntëvjeçare, me pagë prej 500 mijë funtesh në javë.