Gjykata Themelore në Prishtinë ka shpallë aktgjykimin ndaj të akuzuarit B.S., i cili është dënuar me tetë vjet burgim për veprat penale të trafikimit me njerëz dhe lëndimit të lehtë trupor.
Sipas njoftimit të Gjykatës, të akuzuarit i është shqiptuar dënim unik me burgim në kohëzgjatje prej tetë vjetësh.
Po ashtu, atij i është vazhduar masa e paraburgimit deri në plotfuqishmërinë e aktgjykimit.
I akuzuari është obliguar të paguajë 200 euro në emër të paushallit gjyqësor dhe 50 euro për kompensimin e viktimave të krimit. Këto pagesa duhet të bëhen pas plotfuqishmërisë së aktgjykimit.
Ndërkaq, pala e dëmtuar, për realizimin e kërkesës pasurore-juridike, është udhëzuar në kontest të rregullt juridiko-civil.
Kundër këtij aktgjykimi, palët kanë të drejtë ankese në Gjykatën e Apelit të Kosovës brenda 30 ditësh nga dita e pranimit të aktgjykimit.