Duke folur për “TNT Sports Brazil”, para ndeshjes së Real Madridit kundër AS Romës në Ligën e Kampionëve, Jose Mourinho e ka përjashtuar mundësinë e huazimit të Endrickut në janar.
Ylli 20-vjeçar kishte refuzuar mundësitë për t’u larguar nga “Santiago Bernabeu” gjatë verës, pasi Mourinho e kishte bindur të qëndronte.
Megjithatë, që nga ajo kohë, ai ka pasur vështirësi për të siguruar minuta në fillim të sezonit te klubi madrilen, nën drejtimin e trajnerit portugez.
Si rrjedhojë, thashethemet për një largim të mundshëm në formë huazimi në janar, ngjashëm me marrëveshjen që e dërgoi te Olympique Lyon dimrin e kaluar, janë shtuar ndjeshëm javëve të fundit.
Interesant është fakti se AS Roma është njëra prej klubeve që raportohet se është e interesuar për transferimin e Endrickut, pasi kishte tentuar ta siguronte atë në formë huazimi gjatë verës.
Megjithatë, Mourinho, i cili e kishte bindur Endrickun të qëndronte te Real Madridi gjatë verës, i ka mbyllur kategorikisht dyert për një largim në formë huazimi gjatë afatit kalimtar të dimrit.
“Jo, jo, harrojeni. Nëse ka klube të interesuara që po e presin, më mirë të ulen, sepse do të lodhen duke pritur në këmbë”, tha ai.
Më tej, trajneri i Real Madridit e bëri të qartë se e pëlqen shumë Endrickun dhe llogarit plotësisht në të, pavarësisht rolit të kufizuar që ka pasur deri më tani.
“Endrick është një lojtar që e adhuroj absolutisht, një lojtar për të cilin besoj se ka potencial të jashtëzakonshëm dhe që është shumë i rëndësishëm për ne”.
Në fund, Mourinho shtoi: “Kushdo që është i interesuar për të, do të duhet të luftojë fort me mua, sepse besoj se ai nuk ka nevojë të largohet në huazim dhe se do të ketë sukses të jashtëzakonshëm këtu”.
Endrick pati një huazim të suksesshëm te Lyoni gjatë gjysmës së dytë të sezonit të kaluar. Pas kësaj, ai mori ftesë në përfaqësuesen e Brazilit për Kupën e Botës FIFA 2026 dhe u kthye në Madrid me shpresën për të fituar një rol më të rëndësishëm në skuadër.
Megjithatë, një lëndim gjatë përgatitjeve parasezonale, së bashku me afrimet e Carlos Espit dhe Yan Diomandes, kanë bërë që talenti 20-vjeçar të ketë shumë pak paraqitje.
Në fakt, Endrick ka regjistruar vetëm një paraqitje për Real Madridin këtë sezon, kur u aktivizua për vetëm katër minuta në ndeshjen kundër Elches muajin e kaluar.
Por Mourinho këmbëngul se braziliani do të jetë një lojtar i rëndësishëm për të dhe për skuadrën me vazhdimin e sezonit, duke e përjashtuar kështu mundësinë e largimit të tij në formë huazimi./GazetaExpress/