Deputeti i PDK-së, Qëndrim Kryeziu, ka publikuar një dokument që, sipas tij, është pjesë e arkivave që i janë besuar dhe që lidhet me Xhafer Shatrin.
Kryeziu pretendon se dokumenti është një shkresë e Ministrisë së Punëve të Brendshme të Serbisë, e datës 26 shtator 2008, në të cilën përmendet Džafer Šatri, i lindur më 11 tetor 1949 në Tomqiq të Istogut.
Në dokument thuhet se Šatri ka qenë i regjistruar si bashkëpunëtor i SDB-së që nga viti 1982, me nofkën “Mokna”. Po ashtu, dokumenti pretendon se deklarata e tij është marrë nga punëtorë të Departamentit të SDB-së dhe se verifikimet janë kryer përmes punëtorëve të atëhershëm të BIA-s në Leskovc.
Duke iu referuar dokumentit, Kryeziu i ka drejtuar Shatrit një varg pyetjesh, ndër to se kush ia mundësoi ikjen nga burgu, kush ishin personat që e ndihmuan dhe për çfarë arsye.
“Xhafer, këtu paska shumë për ty, por unë kam disa pyetje për ty”, ka shkruar Kryeziu, duke kërkuar sqarime edhe për takimet e pretenduara me pjesëtarë të UDB-së dhe për një veturë që, sipas tij, dyshohet se është përdorur për kalimin e kufirit.
Kryeziu ka ngritur gjithashtu pyetje lidhur me pretendimet për marrjen e informatave rreth vrasjeve të patriotëve, përfshirë Enver Hadri, duke kërkuar nga Shatri të sqarojë rrethanat dhe personat e përfshirë.
Dokumenti i publikuar është paraqitur nga Kryeziu si dëshmi arkivore, ndërsa pretendimet dhe përmbajtja e tij mbeten për t’u verifikuar nga burimet dhe institucionet përkatëse.