Një raport alarmant i publikuar nga revista shkencore The Lancet po ngre shqetësime serioze për gjendjen psikologjike të njerëzimit. Sipas studimit më të fundit, plot 1.2 miliardë njerëz në mbarë botën jetonin me çrregullime mendore në vitin 2023 — një rritje marramendëse prej 95.5% krahasuar me vitin 1990.
Ekspertët zbuluan se ankthi dhe depresioni kanë shpërthyer në nivele rekord, me rritje respektive prej 158% dhe 131%. Studiuesit paralajmërojnë se bota po hyn në “një fazë edhe më shqetësuese” të krizës së shëndetit mendor, ndërsa të rinjtë dhe gratë rezultojnë grupet më të prekura.
Sipas analizës globale të kryer në 204 vende, pandemia e COVID-19 ka lënë pasoja të thella psikologjike. Depresioni nuk është rikthyer më në nivelet para pandemisë, ndërsa ankthi vazhdon të mbetet në nivele alarmante edhe në vitin 2023.
Ekspertët rendisin një sërë faktorësh që po ushqejnë këtë krizë globale: pasiguria ekonomike, luftërat, trauma, izolimi social, dhuna, diskriminimi, problemet financiare dhe ndikimi i rrjeteve sociale tek të rinjtë.
Një nga gjetjet më shqetësuese të studimit ishte fakti se grupmosha 15-19 vjeç po preket më shumë se kurrë më parë nga problemet mendore, një fenomen që studiuesit e konsiderojnë historik dhe tepër alarmues për të ardhmen.