Deputeti i Kuvendit të Kosovës, Bekim Haxhiu, ka kritikuar ashpër kryeministrin Albin Kurti, duke e akuzuar për qasje populiste dhe mungesë vullneti për bashkëpunim politik në një moment të rëndësishëm institucional për vendin.
Sipas Haxhiut, ditëve të fundit Kurti ka rritur ndjeshëm prezencën dhe deklaratat publike, gjë që ai e sheh si ndryshim të qasjes krahasuar me periudhat e mëhershme kur, sipas tij, kryeministri shmangej nga daljet para mediave.
“Një politikan që mendon vetëm për zgjedhje, e jo për zgjidhje, tregon qartë qëllimin e tij autoritar,” ka deklaruar Haxhiu, duke shtuar se situata aktuale politike po shkon drejt një skenari të dëmshëm për shtetin.
Ai ka kritikuar edhe procesin e zgjedhjes së presidentit, duke thënë se me shumicën parlamentare aktuale nuk është arritur konsensus institucional, gjë që sipas tij përbën dështim politik të qëllimshëm.
“Me 51 për qind të votave dhe të mos arrihet zgjedhja e presidentit është dështim i rëndë institucional,” ka theksuar ai, duke shtuar se vendi po mbahet në bllokadë politike.
Haxhiu ka akuzuar kryeministrin Kurti për mungesë takimesh dhe konsultimesh me partitë parlamentare shqiptare, duke pretenduar se nuk është bërë përpjekje reale për konsensus rreth zgjedhjes së kreut të shtetit.
Sipas tij, deklaratat publike për mundësinë e zgjedhjeve dhe përfshirjen e emrave të ndryshëm në diskutime janë pjesë e “lojërave politike populiste”, pa marrëveshje të mirëfilltë politike.
Ai ka paralajmëruar se situata aktuale mund të çojë në zgjedhje të reja dhe thellim të krizës politike, duke akuzuar qeverinë për mungesë përgjegjësie dhe për, siç tha ai, “mbajtje të vendit në dështim institucional”.
Në fund, Haxhiu ka bërë thirrje që qytetarët të mos ndikohen nga premtimet momentale politike, por të fokusohen në interesin afatgjatë të shtetit dhe institucioneve demokratike.