Policia e Kosovës ka konfirmuar vdekjen e dyshimtë të një gruaje në lagjen “Bregu i Diellit” në Prishtinë.
Në përgjigjen e Policisë bëhet e ditur se fillimisht ishte raportuar për një person të lënduar, por që më pas ekipi mjekësor ka konstatuar vdekjen e personit në vend të ngjarjes.
“Rreth orës 13:00, kemi pranuar informatën për një person të lënduar, të shtrirë në afërsi të një objekti në rrugën “Ferat Dragaj” në Prishtinë. Policia dhe ekipi mjekësor menjëherë kanë dalë në vendin e ngjarjes, ku nga ekipi mjekësor është konstatuar vdekja e personit (femër)”, thuhet në përgjigjen e Policisë.
Bëhet e ditur se aktualisht policia po ndërmerr të gjitha veprimet e duhura hetimore dhe ato forenzike – të ekzaminimit, që do të ndihmonin hetimin e ngjarjes si dhe sqarimin dhe ndriçimin e plotë të rastit.
Ndërsa trupi i pajetë i viktimës ende nuk është larguar nga vendi i ngjarjes. /TV Arbëria