Qëndrim Kryeziu ka reaguar ashpër ndaj qeverisë së udhëhequr nga Albin Kurti, duke e cilësuar politikën e çmimeve të naftës si “mashtrimin më të madh” ndaj qytetarëve.
Sipas Kryeziut, në kohën kur qytetarët e zakonshëm – përfshirë punëtorët, bujqit, arsimtarët dhe pensionistët – janë detyruar të paguajnë deri në 2 euro për litër naftë, institucionet shtetërore dhe zyrtarët e lartë janë furnizuar me çmim dukshëm më të ulët, rreth 1.59 euro për litër.
Ai vlerëson se ky dallim i madh në çmime është tregues i qartë se çmimet për qytetarët janë fryrë artificialisht, duke u arsyetuar me krizën në Lindjen e Mesme. Sipas tij, kjo ka shërbyer si pretekst për përfitime të oligarkëve të lidhur me pushtetin, në kurriz të qytetarëve.
“Kjo situatë dëshmon se problemi nuk qëndron te bursa ndërkombëtare, por te keqpërdorimi i brendshëm dhe manipulimi i tregut,” thekson Kryeziu.
Ai shton se kjo situatë rrëzon edhe premtimet e mëhershme të kryeministrit Kurti, i cili kishte deklaruar se gjatë qeverisjes së tij, nafta për bujqit dhe punëtorët do të ishte më e lirë sesa për zyrtarët e pushtetit.
Në fund, Kryeziu ka kërkuar nga organet e drejtësisë që të ndërmarrin veprime konkrete.
“Është urgjente që Prokuroria e Kosovës të nisë hetimet ndaj ministres Mimoza Kusari-Lila dhe kryeministrit Albin Kurti për këtë që ai e quan ‘vjedhje industriale’ në çmimet e naftës,” ka deklaruar ai.