Analisti Afrim Kasolli ka komentuar ashpër qasjen e kryeministrit Albin Kurti ndaj premtimeve ekonomike dhe përballjeve publike, gjatë një paraqitjeje në emisionin ARB Debat në TV Arbëria.
Sipas Kasollit, një nga arsyet pse Kurti nuk i ka realizuar premtimet për uljen e TVSH-së dhe akcizës lidhet drejtpërdrejt me mungesën e presionit elektoral.
“Cila është arsyeja sot që Kurti t’i mbajë premtimet për ulje të TVSH-së dhe akcizës, për aq kohë sa këto nuk po i reflektohen elektoralisht,” u shpreh ai.
Tutje, Kasolli theksoi se refuzimi i Kurtit për t’u përballur me analistë në debate publike ka një arsye strategjike.
Sipas tij, gjatë këtyre përballjeve do të nxirreshin në pah deklaratat e mëhershme të Kurtit si opozitar, duke e vendosur atë në një situatë ku “po ballafaqohet me vetveten”.
Kasolli vlerësoi se kryeministri po tenton ta shmangë këtë lloj ballafaqimi, ndërsa në të njëjtën kohë po e ruan përplasjen me opozitën, pasi kjo, sipas tij, i sjell përfitime elektorale.