Analisti politik Afrim Kasolli ka reaguar përmes një postimi në Facebook duke kritikuar ashpër Partia Demokratike e Kosovës, duke e akuzuar atë për mungesë të qëndrimeve autentike dhe për përdorim të Inteligjencës Artificiale në formulimin e tyre.
Sipas Kasollit, paaftësia e PDK-së për të artikuluar qëndrime politike pa ndihmën e Inteligjencës Artificiale po bëhet gjithnjë e më e dukshme. Ai ka përmendur si shembull një shkrim të deputetes së kësaj partie, Besa Kabashi-Rama, të cilin pretendon se është gjeneruar në masë të madhe nga Inteligjenca Artificiale.
“Vazhdon paaftësia e PDK-së për të artikuluar qëndrime autentike pa ndihmën e IA. Shembull tipik është ky shkrim i ekspertës së sigurisë së kësaj partie, deputetes Besa Kabashi-Rama, i gjeneruar 79 për qind nga kjo platformë”, ka shkruar Kasolli.
Ai shtoi se, sipas vlerësimit të tij, ekziston mundësia që pa përdorimin e Inteligjencës Artificiale kjo parti do të kishte vështirësi serioze për të artikuluar mesazhe politike.
Kasolli theksoi gjithashtu se, sipas shpjegimeve që shoqërojnë analizën e bërë, shkrimi në fjalë nuk konsiderohet i denjë për t’u botuar nga shumë institucione akademike dhe faqe interneti.
Postimi i tij ka nxitur reagime dhe diskutime në rrjetet sociale lidhur me përdorimin e Inteligjencës Artificiale në komunikimin politik.