Dy persona janë arrestuar në Mitrovicën Veriore nën dyshimin për ushtrim ndikimi dhe manipulim gjatë procesit të testimit për patentë shofer.
Sipas njoftimit të Policisë së Kosovës, rasti është identifikuar nga Njësia Rajonale për Hetimin e Krimeve Ekonomike dhe Korrupsionit në Mitrovicë Veri, në bashkëpunim me Stacionin Policor Mitrovicë Veri, pas dyshimeve për manipulim gjatë testimit për patentë shofer.
Dyshohet se një person kishte tentuar të hyjë në testin me shkrim në emër të një kandidati tjetër. Pas ndërmarrjes së veprimeve policore janë arrestuar të dyshuarit dhe janë sekuestruar prova materiale, përfshirë dy telefona celularë dhe 2,000 euro para të gatshme që ndërlidhen me rastin.
Me vendim të prokurorit kujdestar, dy të dyshuar janë dërguar në ndalim policor për 48 orë, ndërsa një person tjetër është liruar në procedurë të rregullt.