Presidentja e Republikës së Kosovës, Vjosa Osmani, ka reaguar me një mesazh të veçantë për Ditën e Flamurit dhe të Pavarësisë së Shqipërisë, duke bërë të ditur se sot është bashkuar me Presidentin e Shqipërisë, Bajram Begaj, nën simbolin e flamurit kombëtar për të shënuar këtë datë historike.
Në postimin e saj, Osmani theksoi rëndësinë e kësaj feste për mbarë kombin shqiptar.
“Presidenti Begaj na mblodhi sonte nën flamurin kuq e zi, për pavarësinë e Shqipërisë. Atmosfera mbante peshën e historisë dhe fuqinë e bashkimit”.
Ajo kujtoi sakrificat e brezave që bënë të mundur lirinë dhe identitetin e shqiptarëve.
“28 Nëntori na kujton se çdo gur i kësaj toke është lagur me gjakun e heronjve tanë, ndaj çdo hap që hedhim sot është amaneti i tyre për më shumë integrim, afrim dhe ndërveprim”.
Presidentja Osmani përmbylli mesazhin e saj me urimin për të gjithë shqiptarët, kudo që ndodhen.
“Gëzuar 28 Nëntorin, shqiptarë kudo që jeni!”.