Tifozët e Kosovës që do të mbështesin Dardanët në stadiumin “Stozhice” në Lubjanë për ndeshjen vendimtare ndaj Sllovenisë, paralajmërohen për rregulla të veçanta sigurie dhe organizimi.
Ndeshja nis në orën 20:45 dhe është kyçe për kualifikimin në Botërorin 2026.
Organizatorët kërkojnë që tifozët të mbërrijnë më herët, nga ora 18:45, për të shmangur tollovinë.
Një paralajmërim i rëndësishëm lidhet me simbolet kombëtare: flamujt dhe simbolika e Kosovës lejohen vetëm në sektorin D, i caktuar për tifozët kosovarë.
Nëse dikush paraqitet me simbole në sektorët A, B dhe C, hyrja do t’i refuzohet, por mund të dorëzojë sendet dhe të provojë sërish.
Interesimi është i madh, duke përfshirë edhe komunitetin kosovar që jeton në Slloveni, dhe stadiumi me 16 mijë vende pritet të dominohet nga Dardanët.
Një barazim i thjeshtë mund t’i sigurojë Kosovës Play-Offin për Botërorin 2026.