Emisioni “Votra me Valin” këtë herë ka udhëtuar në veri të Shqipërisë, në fshatin malor Shishtavec të Kukësit, i njohur për kultivimin e patates dhe thekrës. Banorët e këtij fshati jetojnë kryesisht nga bujqësia, ndërsa patatja mbetet produkti kryesor që u siguron të ardhura dhe mbijetesë.
Në këtë periudhë, patatet tashmë janë vjelë dhe janë nxjerrë nga tokat, ndërsa banorët merren edhe me kultivimin e thekres, një traditë që vazhdon prej brezash. Megjithatë, si në shumë zona të tjera të trojeve shqiptare, edhe Shishtavecin e ka prekur dukuria e migrimit masiv të të rinjve. Shumë familje kanë anëtarë të tyre në emigracion, duke e bërë jetën në fshat më të vështirë.
Pamjet nga emisioni tregojnë se pjesë e sfidave të përditshme janë edhe kushtet e vështira ekonomike, infrastruktura e dobët dhe banesat e ndërtuara me mundësi të kufizuara.
“Votra me Valin” sjell kështu historinë e një fshati që, mes punës në arë dhe mungesës së rinisë, përpiqet të ruajë traditën dhe të mbetet gjallë në zemër të maleve të Kukësit.