Sot do të mblidhet Këshilli i Sigurimit i Organizatës së Kombeve të Bashkuara, në takimin e dytë të rregullt informues për këtë vit mbi situatën në Kosovë.
Zëvendës Përfaqësuesi Special dhe Zyrtari i Përgjegjshëm i Misionit të Administratës së Përkohshme të OKB-së në Kosovë (UNMIK), Milbert Dongjoon Shin, pritet të informojë anëtarët e Këshillit mbi raportin e fundit të Sekretarit të Përgjithshëm të OKB-së për UNMIK-un. Raporti, i cili iu shpërnda anëtarëve më 10 tetor, mbulon zhvillimet në Kosovë nga 16 marsi deri më 15 shtator të këtij viti.
Shin pritet të theksojë zhvillimet kryesore politike dhe të sigurisë në Kosovë gjatë kësaj periudhe. Në përputhje me rregullin 39 të procedurës, në këtë takim pritet të marrin pjesë edhe përfaqësues të Kosovës dhe të Bashkimit Evropian.