Haliti: Fitorja e Lladrovcit s’më befasoi, humbës janë PDK-ja dhe Hajdari

Xhavit Haliti nga Partia Demokratike e Kosovës nuk është shprehur i befasuar me fitoren e Ramiz Lladrovcit në Drenas në zgjedhjet lokale të 12 tetorit.

Haliti ka theksuar se, edhe pse Lladrovci ka garuar me një subjekt tjetër politik, ai vazhdon të jetë pjesë e PDK-së, pasi sipas tij, në çdo parti liberale lejohen fraksionet.

“Ramiz Lladrovci është në PDK. Ne jemi parti liberale dhe, në kuadër të partive liberale, fraksionet janë të lejuara kudo. Nëse Ramizi nuk është pajtuar që të mos garojë, ka krijuar një mekanizëm të tij përmes të cilit ka hyrë në garë. Ai nuk ka pranuar të tërhiqet nga kandidatura, duke qenë kryetar i Drenasit, dhe unë kam thënë se, në të gjitha partitë serioze në botë, kur vendosin organet e partisë, ato vendime duhet të zbatohen. Kam menduar se do ta ketë të vështirë të fitojë, jo pse nuk kam dashur që të fitojë Ramizi, por nuk u befasova me fitoren e tij, sepse fushata për të ka qenë shumë e madhe, si në media ashtu edhe kudo dhe gjithë ajo mbështetje për të ka rezultuar me fitore”, ka deklaruar ai në teve1.

Sipas Halitit, humbës në Drenas janë kryesia e PDK-së dhe kandidati i tyre për kryetar të kësaj komune, Petrit Hajdari, pasi siç tha ai ‘nuk i kanë llogaritur mirë gjërat’.

“Humbës janë Kryesia e Partisë Demokratike të Kosovës dhe kandidati për kryetar në Drenas, Petrit Hajdari. Pra, këta kanë humbur nga Ramizi. Nuk besoj se duhet të kenë ndonjë përgjegjësi, sepse edhe ata janë përpjekur ta mundin Ramizin. Të gjithë ata që morën pjesë në garë nuk ia kanë arritur, dhe tani rezultati është ky. Kryesia Qendrore e PDK-së, natyrisht, nuk i ka llogaritur gjërat mirë. Tani, se në çfarë rrethanash është marrë vendimi, kush ka qenë iniciator dhe kush ka insistuar për ta larguar Ramizin nga kandidatura për këtë ka shumë për të diskutuar. Ata e dinë më mirë pse e kanë marrë atë vendim, edhe Ramizi e di më mirë se ata dhe se unë. Nuk besoj se ai do të heshtë”, ka theksuar Haliti.

Blog Post