Një person ka humbur jetën sot në veri të vendit si pasojë e një aksidenti me traktor.
Këtë e ka konfirmuar Petrit Fejza nga Policia e Kosovës në rajonin verior.
Ai ka bërë të ditur se trupi i viktimës i është dorëzuar familjarëve.
“Rreth orës 10:00 jemi informuar prej qendrës së mjekësisë familjare të Leposaviqit që një person është lënduar, konstatimin e vdekjes e ka bërë mjeku në vendin e ngjarjes. Ai ka qenë duke e tërhjek një lis me traktor, trupi i është dorëzu familjarëve’’, ka thënë Fejza.
Lidhur me rastin ka pasur prononcim më herët edhe zëvendëskomandanti i Policisë për Veriun, Veton Elshani, i cili për Kossev ka thënë se viktima është një 17-vjeçar.
“Rreth orës 11:00, morëm njoftim nga shërbimi i Ndihmës së Shpejtë se në këtë fshat kishte ndodhur një aksident. Kur shkuam në vendngjarje bashkë me ta, ekipi mjekësor konstatoi vdekjen në vend të djalit i cili ishte i lindur në vitin 2008. Ai ka ndërruar jetë si pasojë e lëndimeve të marra kur u përmbys me traktor”, raportohet të ketë thënë Elshani.