Organizata Shqiptaria ka reaguar ashpër pas sulmit ndaj aktivistit të njohur të kauzës kombëtare, Naser Selmani, në Maqedoninë e Veriut.
Në një deklaratë publike, organizata e cilëson incidentin, ku u shpohen gomat e automjetit të Selmanit, jo thjesht si një dëmtim material, por si një akt frikësimi dhe përçarjeje me mesazhe të qarta politike.
Reagimi i plotë:
Reagim publik
Sulmi ndaj aktivistit të kauzës kombëtare, z. Naser Selmani, në Maqedoninë e Veriut, është një akt i shëmtuar dhe një paralajmërim i rrezikut që po kanoset mbi shqiptarët kudo që jetojnë. Shpimi i gomave të automjetit të tij nuk është thjesht dëmtim material, por një mesazh i qartë për frikësim dhe përçarje.
Pas këtyre veprimeve qëndrojnë qarqe të errëta dhe shërbime të huaja që duan ta paraqesin çështjen shqiptare si problem sigurie e destabiliteti. Synimi i tyre është i qartë: të dobësojnë unitetin tonë, të tjetësojnë identitetin tonë kulturor e kombëtar dhe të na sundojnë përmes përçarjes.
Organizata Shqiptaria i qëndron fuqishëm në krah z. Naser Selmani dhe të gjithë atdhetarëve që me guxim e dinjitet e mbrojnë kauzën shqiptare. Ne dënojmë ashpër çdo akt kërcënimi dhe deklarojmë se kauza jonë kombëtare është më e fortë se çdo përpjekje për frikësim.