Babai i vajzës së mitur që u rrah brutalisht nga disa bashkëmoshatare në Gjilan ka rrëfyer ngjarjen duke treguar momentet e vështira që ka përjetuar pasi e ka kuptuar se çfarë i kishte ndodhur vajzës së tij.
Ai tha se për rastin ishte njoftuar fillimisht përmes një telefonate anonime, duke e falënderuar publikisht personin që e ka informuar.
“Unë jam njoftuar për rastin nga një telefonatë anonime nga një person që jeton jashtë, e falënderoj publikisht, sepse kjo që i ka ndodhur vajzës sonë do të ishte fshehur”, tha ai në Klan Kosova.
Prindi theksoi se vajza kishte qenë e shantazhuar nga vajzat e tjera që ta mbante ngjarjen të fshehtë.
“Ka qenë ora 04:20 kur jam informuar dhe mund ta paramendoni se në çfarë gjendje kam qenë si prind kur e kam pa që vajzën time e kanë torturuar 6 hiena apo shtaza”, u shpreh ai.
Sipas tij, vajza nuk e kishte treguar menjëherë atë që kishte ndodhur për shkak të kërcënimeve që kishte marrë nga vajzat që e kishin rrahur.
“E pashë që kishte shenja në fytyrë dhe e pyeta çfarë ka ndodhur, më tha se kishte rrëzuar me trotinet. Dyshova menjëherë, sepse shenjat duken si nga rrahja. Më vonë, e mora vesh ngjarjen”, tha tutje prindi i vajzës.