Doktori Nuredin Fazliu i cili e ka trajtuar policin Enver Zymeri ka treguar se plumbi nga snajperi i kishte shkaktuar plagë të rënda, të cilat më pas ia sollën edhe vdekjen, shkruan Mitropol.
Fazliu ka thënë se gjatë intervenimit, Zymerin për tetë herë e kishin rikthyer në jetë.
“Tetë herë e ka lëshu zemra, do të thotë ka ra në arrest kardiak, tetë herë e kemi reanimu,” tregon doktori.
Fazliu atë ditë kishte marrë pjesë në trajtimin e policit Enver Zymeri, pak minuta pasi polici i njësisë speciale tashmë i ndjerë ishte goditur nga një plumb snajperi.
“Plumbi ka qenë diku në anën e majtë prej këtij ashtit të mollëzës së faqes, në drejtim të kurrizit të qafës. I ka goditë unazën 2 dhe 3, duke shkuar duke depërtuar nëpër gojë. Gjuha ka qenë praktikisht thuja e këputur, aty pastaj kanë punuar këta kolegët e kemi intubuar, e kemi reanimuar,” ka thënë ai.
Fazliu, tash doktor në pension, rrëfen se bënë të pamundurën për ta mbajtur në jetë policin e Kosovës.
Bashkë me të, ai thekson se punuan edhe shumë mjekë të tjerë si doktori Naser Jashari, ortopedi tashmë i ndjerë Afrim Gucati e mjekë të tjerë.
Pas kthimit tetë herë në jetë, polici Enver Zymeri me helikopter të KFOR-it ishte transferuar në QKUK, mirëpo, brenda pak orësh ishte kumtuar lajmi i rëndë për vdekjen e tij.