Sindikata e Punëtorëve të RTK-së ka kërkuar ndërhyrje urgjente nga institucionet për të shmangur krizën financiare që po rrezikon funksionimin e transmetuesit publik, shkruan Reporteri.net.
SPERTK thekson se është e domosdoshme që të alokohet sa më shpejt pjesa e mbetur e buxhetit të miratuar nga Kuvendi, në mënyrë që të garantohet vazhdimësia e misionit të RTK-së.
Sindikata kujton se në nëntor 2024 ka dorëzuar ankesë në Gjykatën Kushtetuese për shkak të zvogëlimit të buxhetit me 2 milionë euro, por deri tani nuk ka marrë përgjigje.
Në komunikatë thuhet se nëse buxheti nuk alokohet deri më 5 gusht 2025, SPERTK paralajmëron nisjen e padive ligjore dhe protestave nga 6 gushti.
Komunikata e plotë:
Sindikata e Punëtorëve të RTK-së kërkon ndërhyrje urgjente për të mos u dëmtuar funksionimi i RTK-së
Sindikata e Punëtorëve të RTK-së (SPERTK) njofton të gjithë punëtorët dhe opinionin publik se nga dita e premte është angazhuar intensivisht me të gjitha palët përgjegjëse, me qëllim që Radio Televizionit të Kosovës t’i shmangen vështirësitë financiare dhe të garantohet funksionimi normal i punës dhe i shërbimit publik.
SPERTK kërkon që sa më shpejt të alokohet pjesa tjetër e buxhetit të miratuar më herët nga Kuvendi i Republikës së Kosovës, për të siguruar vazhdimësinë e misionit të RTK-së pa pengesa financiare.
Theksojmë se në muajin nëntor 2024, Sindikata e Punëtorëve të RTK-së, përmes Avokatit të Popullit, ka dorëzuar ankesë në Gjykatën Kushtetuese lidhur me zvogëlimin për 2 milionë euro të buxhetit të RTK-së. Deri më tani nuk kemi marrë asnjë përgjigje zyrtare për këtë rast, ndaj mbetemi në pritje të një vendimi të drejtë dhe në përputhje me ligjin.
SPERTK u bën thirrje të gjitha partive politike, pa dallim, që të ndërhyjnë menjëherë dhe të gjejnë zgjidhje urgjente për të mos lejuar që RTK të dëmtohet financiarisht dhe të rrezikohet puna e qindra punëtorëve. Kujtojmë se edhe në vitin 2021, megjithëse nuk kishte institucione funksionale në të gjitha nivelet, u gjetën metoda ligjore për alokimin e mjeteve dhe shmangien e krizës financiare.
Në rast se deri më datën 5 gusht 2025 nuk alokohet buxheti në llogarinë e RTK-së, Sindikata do të iniciojë padi për shkelje të ligjit dhe nga data 6 gusht 2025 do të fillojë me protesta dhe greva të lejuara me ligj, deri në realizimin e kërkesave të drejta të punëtorëve dhe garantimin e stabilitetit financiar të transmetuesit publik.
SPERTK mbetet e përkushtuar që, në bashkëpunim me të gjithë faktorët relevantë, të sigurojë që RTK të ketë financim të qëndrueshëm, pavarësi editoriale dhe kushte të dinjitetshme pune për të gjithë punëtorët e saj.