Kryeministri në detyrë, Albin Kurti, takoi sot Ambasadorin e Gjermanisë në Kosovë, Jörn Rohde, i cili u interesua për “çështjen e konstituimit të Kuvendit dhe marrëveshjeve ndërkombëtare që presin miratim”.
ZKM thotë se Kurti theksoi “nevojën dhe rëndësinë që konstituimi i legjislaturës së nëntë të përmbyllet sa më shpejtë me zgjedhjen e kryesisë së Kuvendit”.
“Ai numëroi përpjekjet dhe veprimet e ndërmarra për konstituimin e Kuvendit duke përfshirë edhe takimin me liderët e partive politike në kuvend dhe takimin e ftuar nga presidentja e vendit, në dritën e aktgjykimit të fundit të Gjykatës Kushtetuese”, thuhet në njoftimin e ZKM-së.
Gjithsesi, sipas ZKM-së Kurti “foli edhe për kërcënimin me bombë ndaj Kuvendit të Kosovës që u regjistrua gjatë fundjavës që shkoi. Ai theksoi faktin se institucionet e sigurisë kanë vërtetuar se numri i telefonit nga i cili është bërë kërcënimi është i regjistruar në Serbi dhe i përket kompanisë telefonike MTS, duke konfirmuar kështu që origjina e kërcënimit është në Serbi”, thuhet në njoftim.
Sipas ZKM-së, Kurti dhe Rohde, “bashkë diskutuan për marrëdhëniet bilaterale ndërmjet Kosovës dhe Gjermanisë dhe bashkëpunimin në shumë fusha, e në veçanti në fushën e sundimit të ligjit”.