Më 6 Maj 2025, Korporata Kryeziu në bashkëpunim me Organizatën “Shqiptaria” organizojnë një ngjarje të jashtëzakonshme për të shënuar 620-vjetorin e lindjes së heroit tonë kombëtar, Gjergj Kastrioti – Skënderbeu. Kjo ditë e lavdishme do të festohet me një program të pasur kulturor e artistik, ku pritet pjesëmarrja e figurave të shquara të artit dhe kulturës shqiptare.
Ngjarja do të marrë një dimension edhe më të veçantë me pjesëmarrjen e familjes së Gjergj Kastriotit, duke i dhënë kësaj feste një rëndësi të thellë historike dhe emocionale për mbarë kombin shqiptar.
Aktivitetet do të nisin që në orët e paradites, ku fëmijët do të jenë në qendër të vëmendjes përmes lojërave dhe aktiviteteve edukative, që synojnë të forcojnë lidhjen e brezave të rinj me historinë dhe identitetin kombëtar.
Mbrëmja do të kulmojë me një koncert festiv ku do të performojnë emra të njohur të muzikës shqiptare nga të gjitha trevat – një festë mbarëkombëtare që bashkon shqiptarët në nderim të figurës më emblematike të historisë sonë.
Organizatorët ftojnë të gjithë shqiptarët, brenda dhe jashtë kufijve, që të bëhen pjesë e kësaj ngjarjeje të paharrueshme dhe të festojnë së bashku trashëgiminë e Gjergj Kastriotit – një simbol i pavdekshëm i qëndresës, trimërisë dhe krenarisë kombëtare. /TV Arbëria