“Inatet politike” – Osmani, Kurti e Konjufca s’morrën pjesë në varrimin e babait të Thaçit, munguan edhe Jasharajt

Sot në Burojë të Skënderajt u varros, Haxhi Thaçi, babai i ish-presidentit Hashim Thaçi.

Në ceremoninë e varrimit morrën pjesë numër i madh i personaliteteve të shquara nga jeta politike dhe jo vetëm,  qytetarë të shumtë nga Kosova, Shqipëria e Maqedonia, por jo edhe krerët e shtetit të Kosovës, Vjosa Osmani, Albin Kurti e Glauk Konjufca.

Gjithashtu në ceremoni munguan edhe përfaqësues të familjes së Jasharajve.

Presidentja Osmani dërgoi dërgoi dikë nga stafi i saj, derisa Kurti e Konjufca dërguan vetëm letër për ngushëllime.

Në letrën e ngushëllimit për familjen Thaçi, kryeministri u shpreh se Haxhi Thaçi do të kujtohet gjithmonë për urtësinë e tij, respektin për të tjerët dhe dashurinë e madhe për vendin.

“Në emër të Qeverisë së Republikës së Kosovës dhe timin ju shpreh ngushëllimet më të sinqerta juve, dashamirëve të familjes suaj dhe miqve të ish-presidentit Hashim Thaçi”, thuhej në letër.

Ndryshe, Hashim Thaçi, më 13 mars, me leje të përkohshme, vizitoi të atin e sëmurë në spital. Ai ndodhet në paraburgim që nga nëntori i vitit 2020, nën akuzën për krime lufte dhe së fundmi edhe për pengim të drejtësisë./TV ARBËRIA./