Nga Agron Hoti
Sa shkeljet e shumta kushtetuese e ligjore (përjashto këtu korrupsionin jashtë çdo kontrolli) e sa dëmet në rrafshin ndërkombëtar i ka bërë pushteti aktual (përfshirë humbjen totale të kontrollit në veri), s’i ka bërë asnjë pushtet në Kosovë që nga çlirimi e deri me sot.
Në vende me demokraci të zhvilluara shkelje kaq të shumta kushtetuese, ligjore dhe institucionale do ta kishin fundosur partinë qeverisëse për vite të tëra. Por, kjo do të mund të ndodhte vetëm nëse opozita aktivisht do t’i kapitalizonte politikisht gjithë ato shkelje e jo të flinte për plot katër vite. Nëse askush s’i dekonstrukton para qytetarëve politikat e pushtetit, atëherë qytetarët vazhdojnë avazin e përkrahjes së pushtetit, pavarësisht cilësisë qeveritare. Nuk e kemi zbuluar ne shqiptarët këtë, por kjo është kështu në tërë botën.
Qytetarët askund në botë s’ia dalin të vetëmobilizohen as për partinë në pushtet e as partitë në opozitë. Janë partitë politike, feja apo organizime tjera shoqërore që e organizojnë një popull. Bile bile, as për luftë (çlirimtare apo pushtuese) qytetarët s’ia dalin kurrë të vetëmobilizohen dhe vetëorganizohen pa e pasur një strukturë qoftë politike apo fetare që do t’i printe organizimit. Historia e ka dëshmuar këtë sa e sa herë.
Mjerisht, Kosova për këto katër vite ishte pa opozitë, pa shoqëri civile, pa ndonjë organizim strukturor që do ta sfidonte pushtetin për shkeljet e panumërta. Dhe kur vendi s’ka opozitë apo ndonjë organizim shoqëror si alternativë, atëherë qytetari mendon që pushteti është duke punuar mirë. Dhe është pikërisht kjo që ka ndodhur në Kosovë.
Opozita i ka ndezur motorët vetëm gjatë fushatës zgjedhore, por kjo përpos që është tepër vonë është edhe e pamjaftueshme për ta bindur qytetarin për alternativë qeverisëse. Sa është fajtor pushteti për këtë izolim dhe sanksionim të Kosovës nga Perëndimi, po aq fajtore është heshtja e opozitës për këto katër vite, sepse demokracia pa opozitë e lë shtetin sakat sikur njeriu pa një dorë e pa një këmbë, saktësisht siç ka ngelur shteti i Kosovës sot, ku eksodi (ikja) masive e rinisë dhe e profesionistëve përpos që ka shkretuar tanimë fshatrat, njëjtë është duke e shkretuar tërë vendin.