Presidenti ukrainas, Volodymyr Zelensky ka sugjeruar që një marrëveshje armëpushimi mund të arrihet nëse territori ukrainas që ai kontrollon mund të merret “nën ombrellën e NATO-s” – duke e lejuar atë të negociojë kthimin e pjesës tjetër më vonë “në mënyrë diplomatike”.
Në një intervistë me korrespondentin kryesor të Sky News, Stuart Ramsay, presidentit ukrainas iu kërkua t’i përgjigjet raporteve të mediave se një nga planet e presidentit të zgjedhur të SHBA-së, Donald Trump, për t’i dhënë fund luftës në Ukrainë, mund të jetë që Kievi t’i dorëzojë Rusisë tokën që ka marrë, në këmbim të anëtarësimit të Ukrainës në NATO.
Zelensky tha se anëtarësimi në NATO do të duhet t’u ofrohet pjesëve të papushtuara të vendit në mënyrë që t’i jepet fund “fazës së nxehtë të luftës”, për sa kohë që vetë ftesa e NATO-s njeh kufijtë e njohur ndërkombëtarisht të Ukrainës.
Ai dukej se pranonte se pjesët lindore të okupuara të vendit do të dilnin jashtë një marrëveshjeje të tillë për momentin.
“Nëse duam të ndalojmë fazën e nxehtë të luftës, duhet të marrim nën ombrellën e NATO-s territorin e Ukrainës që kemi nën kontrollin tonë”, tha ai.
“Ne duhet ta bëjmë atë shpejt. Dhe pastaj në territorin e pushtuar të Ukrainës, Ukraina mund t’i kthejë ato në një mënyrë diplomatike”, vazhdoi lideri ukrainas.
Zelensky ndër tjera tha se një armëpushim ishte i nevojshëm për të “garantuar se presidenti rus, Vladimir Putin, “nuk do të kthehet për të marrë më shumë territor”.
“Duhet të punojmë me presidentin e ri”
Në intervistën e tij të parë me mediat britanike që nga fitorja e Trumpit në zgjedhje, Zelensky u pyet edhe se çfarë mendonte për presidentin e zgjedhur amerikan.
“Ne duhet të punojmë me presidentin e ri në mënyrë që ta kemi mbështetësin më të madh”, u shpreh ai.
“Unë dua të punoj me të drejtpërdrejt sepse ka zëra të ndryshëm nga njerëzit rreth tij. Dhe kjo është arsyeja pse ne nuk duhet të lejojmë askënd përreth të shkatërrojë komunikimin tonë”, vazhdoi Zelensky.
I pyetur nëse kishte folur me Trumpin, Zelensky tha se dyshja kishin folur në shtator kur ai ishte në New York, duke shtuar: “Ne patëm një bisedë. Ishte shumë e ngrohtë, e mirë, konstruktive”.
Ndryshe, intervista është hera e parë që Zelensky ndan informata të tilla për territoret ukrainase, shkruan skynews, përcjell Telegrafi.
Gjatë gjithë konfliktit, ai nuk ka thënë kurrë se do t’i dorëzojë Rusisë një territor të okupuar ukrainas – duke përfshirë Krimenë, të cilën Rusia e pushtoi në shkurt 2014 dhe e aneksoi zyrtarisht muajin e ardhshëm.
Ai deklaronte se një veprim i tillë nuk lejohet sipas kushtetutës së Ukrainës dhe e vetmja mënyrë që do të ishte e mundur është nëse njerëzit në ato zona bien dakord të shkëputen.
Më e largëta që ai ka shkuar më parë ishte gjatë një interviste me Le Monde në korrik të këtij viti, kur ai sugjeroi se territoret mund t’i bashkoheshin Rusisë nëse votonin në një referendum të lirë dhe të drejtë.
Por ai tha se Kievi do të duhej ta kishte përsëri territorin nën kontrollin e tij për të mbajtur një votim të tillë.
Siç raportohet, rreth një e pesta e territorit ukrainas mbetet nën kontrollin rus.
Në shtator të vitit 2022, Rusia shpalli në mënyrë të njëanshme aneksimin e zonave në dhe rreth rajoneve ukrainase të Donetsk, Kherson, Luhansk dhe Zaporizhzhia pas referendumeve që nuk ishin njohur ndërkombëtarisht.
Qëndrimi i mbajtur prej kohësh i Zelensky është se territori mbetet ukrainas, se pushtimi i tokës nga Rusia është i paligjshëm dhe se Kievi nuk do të heqë asnjë nga territoret e tij për të arritur një marrëveshje paqeje.
Në fillim të këtij viti ai paraqiti një “plan fitoreje” i cili përfshinte një refuzim për të lëshuar territorin dhe sovranitetin ukrainas.
Megjithatë, Moska ka sugjeruar se nuk do të heqë dorë nga tokat.