Sot(e shtune), në Universitetin “Isa Boletini” në Mitrovicë është zhvilluar provimi i Jurisprudencës, i cili ka ngritur shqetësime për kushtet jo të përshtatshme në të cilat janë mbajtur testimet.
Sipas burimeve të Dukagjinit, temperaturat në sallat e provimit kanë qenë shumë të ulëta, duke e bërë pothuajse të padurueshëm qëndrimin për periudha të gjata.
Provimi, që filloi në orën 08:00 të mëngjesit dhe vazhdoi deri në ora 14:00, u zhvillua pa asnjë burim ngrohjeje funksional.
Sipas burimeve disa nga kandidatët kanë shprehur shqetësim për ndikimin që këto kushte mund të kenë pasur në performancën dhe shëndetin e tyre.
Sipas Meteo Kosova, temperaturat gjatë së shtunës kanë variuar nga -1°C në mëngjes deri në 2°C, ndërsa temperaturat maksimale kanë arritur vetëm deri në 5–8°C.