Burgu i Gjilanit pritet që në fundvitin e ardhshëm të jetë gati për të pritur të burgosurit e vendeve të ndryshme të ndaluar në Danimarkë. Por marrëveshja vazhdon të kritikohet si cenim i të drejtave të njeriut nga Organizata e Kombeve të Bashkuara dhe aktivistë të të drejtave të njeriut.
Zyra e Komisionarit të Lartë të Kombeve të Bashkuara për të Drejtat e Njeriut (OHCHR) në fillim të vitit i kërkoi Mbretërisë së Danimarkës që të përmbahet nga marrja me qira e objekteve të paraburgimit jashtë territorit të saj dhe të sigurojë që të burgosurit të mos diskriminohen në bazë të kombësisë dhe statusit familjar.
Zëdhënësja e misionit të OKB-së në Kosovë, Hayat Abu Saleh, thotë se kjo marrëveshje mund të çojë në një rritje të shkeljeve të të drejtave të të burgosurve, duke përfshirë të drejtat për mosdiskriminim, jetën familjare dhe shëndetin.
“Kjo gjithashtu ngre shqetësime për mbrojtjen e të drejtave të njeriut, duke përfshirë mundësimin e monitorimit efektiv të pavarur sipas Rregullave Standarde Minimale të Kombeve të Bashkuara për trajtimin e të burgosurve (Rregullat e Nelson Mandela) dhe instrumenteve të tjera rajonale e ndërkombëtare të të drejtave të njeriut”, i ka thënë Abu Saleh Radio Kosovës.
Më tej Abu Saleh thotë se marrëveshja ngre shqetësime për të drejtat e vetë të burgosurve kosovarë, pasi statistikat tregojnë se burgjet janë në kufijtë të kapacitetit të tyre.
Zyra e Komisionerit të OKB-së u ka kërkuar autoriteteve në Danimarkë e Kosovë që të mbrojnë të drejtat e të transferuarve, përfshirë sigurimin e vendosjes së masave mbrojtëse efektive.
Por autoritet në Danimarkë thonë se jo gjithçka ka përfunduar rreth traktatit me Kosovën.
Jens Høyer Jensen, zyrtar për media në Ministrinë e Drejtësisë së Danimarkës, thotë se Avokati i Popullit iParlamentit danez do të përfshihet në tërë procesin e transferimit.
“Burgu nuk do të vihet në përdorim derisa të vlerësohet se në thelb kushtet korrespondojnë me ato të burgjeve daneze dhe se dënimi mund të bëhet brenda detyrimeve ndërkombëtare”, i ka thënë Jensen Radio Kosovës .
Ai thotë se Shërbimi Danez i Burgjeve vuan nga një mungesë serioze e kapaciteteve dhe stafit. “Marrëveshja për qiranë e burgut të Gjilanit me kapacitet për 300 të burgosur na ndihmon në zgjidhjen e këtij problemi. Po ashtu, kjo do t’i mundësojë Kosovës të investojë në sistemin e burgjeve dhe të zhvillojë kapacitetet në fushën e sundimit të ligjit”, ka shtuar Jensen.
Rina Kika, aktiviste për të drejtat e njeriut dhe avokate,ujdinë e Kosovës dhe Danimarkës e sheh si shumë problematike nga aspekti i të drejtave të njeriut dhe strategjikisht të gabuar nga ana e Kosovës.
“Nuk duhet të ketë tregti me të drejtat e njeriut – të sigurohet investimi në energji të ripërtërishme e në shërbim korrektues, në këmbim të cenimit të të drejtave të njeriut të të burgosurve”, i ka thënë Kika Radio Kosovës.
“Danimarka, me bashkëpunimin e Kosovës, po e krijon një sistem dual, të ndarë vetëm për të burgosurit jo-danezë, që paraqet trajtim diskriminues në bazë të shtetësisë”, shton ajo.
Agim Demiri, drejtor i Departamentit Ligjor në Shërbimin Korrektues,thotë se për faktin se traktati ka kaluar të gjitha procedurat ligjore, vlerësohet se janë shqyrtuar edhe konventat e të drejtave të njeriut.
“Deri në ekzekutimin e dënimeve daneze, nuk mund të identifikohen pengesat e mundshme për realizmin e marrëveshjes”, i ka thënë Demiri Radio Kosovës.
Traktati ndërmjet Danimarkës e Kosovës që u ratifikua në qershor të këtij viti, parasheh që burgu do të vihet në përdorim deri në 26 muaj nga ratifikimi i tij.
