Përzgjedhësi i grupmoshës U19 të Kosovës, Adil Maliqi, ka publikuar të premten listën e futbollistëve që janë ftuar për ndeshjet kualifikuese të Evropianit të vitit të ardhshëm, e që i është besuar për organizim FFK-së.
Kosova në Grupin 10 do të luajë përballë Spanjës, Austrisë dhe Ishujve Faroe.
Në listë janë 20 futbollistë, ndërsa në listën e zgjeruar janë nëntë të tjerë.Në mesin e 20 futbollistëve janë Andi Demiri që luan te U23 të Lillet dhe në U19 në UEFA Youth League, Leart Hoti është pjesë e Eintracht Frankfurtit, kurse Deli Hajdini luan te të rinjtë e Stuttgartit. Leon Parduzi është emri tjetër i ri që aktivizohet te Karlsruher SC.
Ai ka debutuar edhe me ekipin e parë në Bundesliga 2.
Nga Serie B në Itali është ftuar Indrit Mavraj, që është pjesë e Barit.
Kosova U19 më 13 nëntor luan ndaj Austrisë, më 16 nëntor ndaj Spanjës dhe më 19 nëntor ndaj Ishujve Faroe.
Ndeshjet ndaj Austrisë e Spanjës luhen nga ora 15:00, ndërsa ndaj Ishujve Faroe, ballafaqimi nis në orën 12:00.
Të gjitha ndeshjet e këtij grupi, Kosova U19 i luan në stadiumin “Fadil Vokrri” në Prishtinë.
