Borxhi total publik në botë do të kalojë 100 trilionë dollarë këtë vit për herë të parë dhe mund të rritet më shpejt se sa pritej pasi ndjenjat politike favorizojnë shpenzimet më të larta dhe rritja e ngadaltë rrit nevojat dhe kostot e huamarrjes, u shpreh Fondi Monetar Ndërkombëtar.
Raporti më i fundit i Monitorit Fiskal të FMN-së tregoi se borxhi publik global do të arrijë në 93% të Produktit të Brendshëm Bruto global deri në fund të 2024-ës dhe do t’i afrohet 100% deri në vitin 2030. Kjo do të kalonte kulmin prej 99% gjatë COVID-19. Do të rritet gjithashtu 10 pikë përqindjeje nga viti 2019, përpara se pandemia të shtonte ndjeshëm shpenzimet e qeverive.
I publikuar një javë përpara se FMN dhe Banka Botërore të mbajnë takimet vjetore në Uashington, Monitori Fiskal tha se ka arsye të mira për të besuar se nivelet e ardhshme të borxhit mund të jenë shumë më të larta se sa është parashikuar aktualisht, duke përfshirë dëshirën për të shpenzuar më shumë në SHBA, ekonominë më të madhe në botë. Në raport thuhet se presionet e shpenzimeve për të adresuar tranzicionet e gjelbra, plakjen e popullsisë, shqetësimet e sigurisë dhe sfidat e gjata të zhvillimit janë në rritje.
Shqetësimet e FMN-së për rritjen e niveleve të borxhit vijnë tre javë përpara zgjedhjeve presidenciale në SHBA, në të cilat të dy kandidatët kanë premtuar ulje të reja tatimore dhe shpenzime që mund të shtojnë triliona dollarë në deficitet federale.
Projeksionet e borxhit priren të nënvlerësojnë rezultatet aktuale me marzhe të konsiderueshme, me raportet e realizuara të borxhit ndaj PBB-së pesë vjet përpara, mesatarisht 10% më të larta se sa ishte parashikuar fillimisht.
Raporti përfshin një “skenar shumë të pafavorshëm” që tregon se borxhi publik global mund të arrijë në 115% në vetëm tre vjet, 20 pikë përqindje më të lartë se sa është parashikuar aktualisht./Scan/
