Ambasadori i Gjermanisë në Prishtinë, Joern Rohde, ka reaguar me rastin e shënimit të njëvjetorit të rënies heroike të rreshterit policor, Afrim Bunjaku, i cili u vra pas një sulmi terrorist nga një grup i armatosur serb të udhëhequr nga Milan Radoiçiq në Banjskë të Zveçanit.
Në një postim në platformën X, Rohde ka përsëritur reagimin e ambasadës, duke thënë se Radoiçiq mbetet i lirë në Sebi pavarësisht se ka pranuar fajin dhe ka marrë përgjegjësinë për sulmin.
Sipas tij, kjo mungesë përgjegjësie dëmton paqen, andaj drejtësia duhet të vendoset pa vonesë ose justifikim.
Vëllai i Afrim Bunjakut: I kam thënë ruaju se s’është situata mirë, më tha nuk frikësohem
“Një vit më parë, @Kosovo_Police Në Banjskë është vrarë oficeri Afrim Bunjaku. Sakrifica e tij nuk do të harrohet. Megjithatë, Radoiçiq, autori i dyshuar, mbetet i lirë në 🇷🇸 pavarësisht se e pranon fajin. Kjo mungesë përgjegjësie dëmton paqen. Drejtësia duhet të vendoset – pa vonesë ose justifikim”, shkroi diplomati gjerman.
Në reagimin e plotë të ambasadës së Gjermanisë në Kosovë, thuhet se dështimi për të mbajtur përgjegjës përgjegjësit, është mesazh i rrezikshëm dhe se drejtësia duhet të vendoset.
“Një vit më parë, gjatë sulmit të tmerrshëm në Banjskë, polici i Kosovës Afrim Bunjaku humbi jetën. Sakrifica e tij nuk do të harrohet, por fakti mbetet: Milan Radoiçiq, autori i supozuar pas këtij krimi, pavarësisht se ka pranuar përgjegjësinë, është ende i lirë në Serbi.
“Dështimi për të mbajtur përgjegjës përgjegjësit, pavarësisht pranimeve të qarta të fajit, minon paqen në rajon dhe dërgon një mesazh të rrezikshëm. Drejtësia duhet të vendoset. Nuk ka më vonesa apo justifikime”, thuhet në reagimin e ambasadës gjermane në Kosovë.
Ndryshe, lidhur me sulmin e vitit të kaluar, Prokuroria Speciale e Republikës së Kosovës, dy javë më parë ngriti aktakuzë ndaj 45 personave.
Prokurori i rastit, Naim Abazi kishte thënë se ky rast përfshin ngritjen e aktakuzës kundër një grupi të strukturuar kriminal të përbërë nga 45 persona të cilët dyshohen për veprat penale kundër rendit kushtetues juridik, kryerja e veprave terroriste, financim të terrorizmit dhe shpëlarje parash.
“Ndër të akuzuarit kryesor është edhe udhëheqësi kryesor i grupit, Milan Radoiçiq, cili ka luajtur rol të rëndësishëm në koordinimin dhe veprimtarinë kriminale”, kishte deklaruar Abazi.
