Vendvotimet u hapën të dielën në shtetin gjerman të Brandenburgut, ku Alternativa e ekstremit të djathtë për Gjermaninë (AfD) parashikohet të përfundojë e para, duke synuar të ndërtojë sukseset e fundit në shtetet e tjera lindore dhe të kalojë socialdemokratët e kancelarit Olaf Scholz në këtë bastion tradicional.
AfD u bë partia e parë e ekstremit të djathtë që fitoi zgjedhjet shtetërore në Gjermani që nga Lufta e Dytë Botërore, në Turingi, më 1 shtator dhe sapo humbi vendin e parë në Saksoni, raporton Reuters, përcjell Insajderi.
Është një nga disa grupe të së djathtës ekstreme në Evropë që po përfiton nga shqetësimet për ngadalësim ekonomik, imigracion dhe luftën në Ukrainë – shqetësime këto që janë veçanërisht të forta në Gjermaninë lindore.
Partia, e cila nuk ka gjasa të jetë në gjendje të qeverisë sepse nuk ka shumicë dhe partitë e tjera do të refuzonin të bashkëpunonin me të, po kërkon gjithashtu të përfitojë nga pakënaqësia për grindjet në koalicionin federal trepartiak të kancelarit Scholz.
Hans-Christoph Berndt, kandidati i AfD-së për kryeministër të shtetit të Brandenburgut, votoi të dielën në qytetin e Golssen, në jug të Berlinit, duke shprehur optimizëm për perspektivat e partisë së tij.
“Nëse vazhdojmë të marrim të njëjtin nivel mbështetjeje që kemi parë javët dhe muajt e fundit, gjërat në Gjermani do të fillojnë të përmirësohen”, tha Berndt.
Fitorja e AfD-së në zgjedhjet shtetërore do t’i shkaktonte kokëçarjes Social Demokratëve (SPD), parti kjo e cila ka fituar zgjedhjet në Brandenburg dhe ka qeverisur shtetin prej 2.5 milionë banorësh që nga ribashkimi i dy Gjermanive më 1990.
