Kryetari i Federatës së Futbollit të Kosovës (FFK), Agim Ademi, mund të ketë sërish telashe me organet e drejtësisë.
Kryeprokurori i Prishtinës, Zejnullah Gashi, ka dhënë detaje për TV Dukagjinin, lidhur me rastin ku Ademi po dyshohet se ka kërcënuar tre futbollistë të kombëtares së Kosovës.
Ai e ka konfirmuar se Prokuroria e ka autorizuar Policinë e Kosovës të marrë informata dhe t’i verifikojë ato.
“E konfirmoj se është autorizuar Policia e Kosovës të verifikojë këto informata nëse ka të bëjë diçka me veprën penale “kanosje”. Pastaj, pasi të sigurohen informatat e Policisë do të vendosim nëse do të hapet rast për një vepër penale të tillë. Do t’i verifikojmë informatat e Policisë, nëse janë të vërteta do të fillojmë me hetimet”, ka thënë Gashi.
Agim Ademi ishte denoncuar publikisht nga opinionisti sportiv, Ramiz Shala, në emisionin “Dueli Sportiv” në TV Dukagjini se i ka kërcënuar futbollistët e Kosovës, Edon Zhegrova, Arijanet Muric dhe Florent Muslija, me fjalët – “jau thej komtë, jau prishi karrierën”.
Të tre futbollistët ishin përjashtuar nga grumbullimi i fundit i Kombëtares së Kosovës, për shkak se kishin thyer rregullat e ekipit kombëtar.
Gjithashtu, edhe gazetari sportiv, Arlind Sadiku, kishte thënë se e ka marrë konfirmimin prej njërit nga futbollistëve të përjashtuar se Ademi ua ka thënë këto fjalë.
“Skandaloze Njëri nga futbollistët e përjashtuar, në kushte anonimiteti, pranoi se Agim Ademi i ka kërcënuar duke iu thënë “jau thej komtë, jau prishi karrierën”!” – kishte shkruar Sadiku në profilin e tij në Facebook.
